|
Николай Николаевич Уляшев 1907–1994 «Книга памяти Республики Коми», том 6, стр. 342
Николай Николаевич, Öль Паладь пöчöлöн меддзоля пи Война сувтiгöн служитіс нин Ташкентын, кöнi дасьтiсны старшöй лейтенантъясöс (вöлi медводдза выпуск). Том офицеръясöс сэсянь и нуисны фронт вылö. Николай Николаевич веськаліс Кременчуг кар улö. Танi сiйö зэв ёна ранитчис да дыр бурдöдчис госпитальын, но помöдз эз бурд: ёна висис кокыс, бать чотiс, и фронт вылö пыр жö абу ыстöмаöсь. Служитіс тылын батальон штабса начальникöн. Сэнi тöлысь чöж том рекрутъясöс фронт вылö мунтöдз велöдісны тышкасьны. Сiдз жö вӧлі раненöйясöс эвакуируйтöм кузя перевалочнöй пункт. Узбекистанö, Уралö, Дальньöй Востокö мунлісны доймалöм да висьысь боецъяс тыра эшелонъяс. 1943-öд воын Николай Николаевичöс мöдöдісны служитны 3-öд Ударнöй Армияса 150-öд Идрицко-Берлинскöй стрелкöвöй дивизияö, кодi наступайтіс Германияö Польша пыр. Николай Николаевич – старшöй лейтенант, 2-öд батальонса комбат. Эз вöв кокни тышкасьны: вöрöг пиньöн и гыжйöн водзсасис, бурöн эз кöсйы сетчыны. Медся пö вöлi сьöкыд воштавны ёртъяснымöс, медся томъяссö, ёнъяссö, сюсьяссö! Мыйта эськö бур уджалысь петiс – ученöй, врач, велöдысь, инженер, лётчик, поэт, серпасасьысь, видз-му бертысь… 1945-öд вося февраль 15-öд лунö польскöй Ястрово кар дорын бать чорыда ранитчис морöсас. Дыр куйліс бурдöдчанiнын, Быдгощын карын, но помӧдз эз и бурд: лолалiс сöмын öти тынас. Победа лун паныдаліс госпиталяс. Сьöлöмсяньыс нимкодясис, мый Идрицко-Берлинскöй дивизияыс штурмуйтіс Берлин, и 3-öд батальонса разведчикъяс лэптісны рейхстаг вылö Победалысь флаг. Öнi ыджыд батьныслысь орден-медальяссö видзöны внукъясыс (менам челядь) век казьтылöм вылö. Гортас Николай Николаевич воис 1945-öд вося ноябрын. Пöчлы нимкодьыд! Кöть инвалидöн, но ловйöн воис вир кисьтанiнысь дзоля пиыс! Сэсся фронтöвик тöдмасис Öньö Маринкöд, менам мамкöд, да гöтрасис сы вылö. А Марина Андреевналöн быдмис нин нёль арöса нылук (тайö ме, Виталина. Менам батьöй, Бадьёльйывса зон – Николай Степанович Уляшев, пуктіс юрсö Рöдина вöсна 1942-öд воын. Мамлы воис усьöм йывсьыс юöрыс менам чужтöдз на тöлысьӧн водзджык. Мам уджаліс Вöльдiн сельпоын да и колхозас на колiс норма тыртны – дзоля кагатö видзны некор. 4 тöлыссянь 4 арöсöдз менö видзис Югыдтыдорын ыджыд мамöй – Павел Педöсь, Вöльдiнса жö. Вокыс Федосья Павловналöн – фронтöвик Öлексан – война вылын воштiс куим пиöс: Митрейöс, Серафимöс да Öлексейöс. Николай Николаевич лои меным мöд батьöн, видзис-быдтiс менö зэв бура. Тадзи пöчлöн, Пелагея Алексеевналöн, лоис нӧшта öти внучка. 1946-öд воас ми мунiм Печораö – овмöдчим выль семьяöн. 1949-öд воын батьö зэв ёна висьмис, да ми бöр воим Вöльдiнö: бать омöльччис, кутiс шуны, окота пö кувны гортын. Вель дыр олiм пöчöясын, сэсся асланым керкаын. Вöльдiнса вöр-ваыс ловзьöдiс батьöс, сетiс водзö овны вын. 1955-öд восянь олiм Ягкöджын. Ягкöджын Николай Николаевичöс шуисны Охотникöн. Кыйлiс зьвер-пöтка, чери. Частö олiс аслас вöр керкаын. Кыйдöссö вайлiс гортö, да и буралысь мортыд уналы сiдз разöдлiс. Виталина Николаевна Ежова
Материал предоставлен Вольдинской библиотекой |
